അദ്ധ്യായം 1
- അഭിവാദനങ്ങള്
1: ദൈവതിരുമനസ്സിനാല് യേശുക്രിസ്തുവിന്റെ അപ്പസ്തോലനായ പൗലോസ്, യേശുക്രിസ്തുവില് വിശ്വസിക്കുന്നവരായി എഫേസോസിലുള്ള വിശുദ്ധര്ക്കെഴുതുന്നത്.
2: നമ്മുടെ പിതാവായ ദൈവത്തില്നിന്നും കര്ത്താവായ യേശുക്രിസ്തുവില്നിന്നും നിങ്ങള്ക്കു കൃപയും സമാധാനവും!
3: സ്വര്ഗ്ഗീയമായ എല്ലാ ആത്മീയവരങ്ങളാലും ക്രിസ്തുവില് നമ്മെയനുഗ്രഹിച്ചവനും കര്ത്താവായ യേശുക്രിസ്തുവിന്റെ പിതാവുമായ ദൈവം സ്തുതിക്കപ്പെട്ടവനാകട്ടെ!
4: തന്റെമുമ്പാകെ സ്നേഹത്തില് പരിശുദ്ധരും നിഷ്കളങ്കരുമായിരിക്കാന് ലോകസ്ഥാപനത്തിനുമുമ്പുതന്നെ അവിടുന്നു നമ്മെ ക്രിസ്തുവില് തെരഞ്ഞെടുത്തു.
5: യേശുക്രിസ്തുവഴി, നാം അവിടുത്തെ പുത്രരായി ദത്തെടുക്കപ്പെടണമെന്ന്, അവിടുന്നു തന്റെ ഹിതവും ലക്ഷ്യവുമനുസരിച്ച് മുന്കൂട്ടി തീരുമാനിച്ചു.
6: അവിടുന്നിപ്രകാരംചെയ്തത് തന്റെ പ്രിയപ്പെട്ടവനിലൂടെ നമ്മില് ചൊരിഞ്ഞ, തന്റെ കൃപയുടെ മഹത്വത്തിനും പുകഴ്ചയ്ക്കുംവേണ്ടിയാണ്.
7: അവിടുത്തെ കൃപയുടെ സമൃദ്ധിക്കൊത്ത്, നമുക്കു ക്രിസ്തുവില് പാപമോചനവും അവന്റെ രക്തംവഴി രക്ഷയും കൈവന്നിരിക്കുന്നു.
8: ഈ കൃപയാകട്ടെ അവിടുന്നു തന്റെ ജ്ഞാനത്തിലും വിവേകത്തിലും നമ്മില് സമൃദ്ധമായി ചൊരിഞ്ഞിരിക്കുന്നു.
9: ക്രിസ്തുവില് വ്യക്തമാക്കിയ തന്റെ അഭീഷ്ടമനുസരിച്ച്, അവിടുന്നു തന്റെ പദ്ധതിയുടെ രഹസ്യം നമുക്കു മനസ്സിലാക്കിത്തന്നു.
10: ഇത്, കാലത്തിന്റെ പൂര്ണ്ണതയില് സ്വര്ഗ്ഗത്തിലും ഭൂമിയിലുമുള്ള എല്ലാറ്റിനെയും ക്രിസ്തുവില് ഒന്നിപ്പിക്കുന്നതിനുവേണ്ടിയത്രേ.
11: തന്റെ ഹിതമനുസരിച്ച്, എല്ലാം പൂര്ത്തിയാക്കുന്ന അവിടുന്ന്, തന്റെ പദ്ധതിയനുസരിച്ച് അവനില് നമ്മെ മുന്കൂട്ടി തെരഞ്ഞെടുത്തു നിയോഗിച്ചു.
12: ഇത്, ക്രിസ്തുവിലാദ്യമായി പ്രത്യാശയര്പ്പിച്ച നാം അവന്റെ മഹത്വത്തിനും സ്തുതിക്കുംവേണ്ടി ജീവിക്കുന്നതിനാണ്.
13: രക്ഷയുടെ സദ്വാര്ത്തയായ സത്യത്തിന്റെ വചനം ശ്രവിക്കുകയും അവനില് വിശ്വസിക്കുകയുംചെയ്ത നിങ്ങളും വാഗ്ദാനം ചെയ്യപ്പെട്ട പരിശുദ്ധാത്മാവിനാല് അവനില് മുദ്രിതരായിരിക്കുന്നു.
14: അവിടുത്തെ മഹത്വം പ്രകീര്ത്തിക്കുന്നതിനുള്ള അവകാശം നാം വീണ്ടെടുത്തു സ്വന്തമാക്കുന്നതുവരെ ആ അവകാശത്തിന്റെ അച്ചാരമാണ് ഈ പരിശുദ്ധാത്മാവ്.
- ക്രിസ്തു മഹോന്നതന്
15: കര്ത്താവായ യേശുവിലുള്ള നിങ്ങളുടെ വിശ്വാസത്തെയും എല്ലാ വിശുദ്ധരോടും നിങ്ങള് പ്രകടിപ്പിക്കുന്ന സ്നേഹത്തെയുംകുറിച്ചു കേട്ടനാള്മുതല് എന്റെ പ്രാര്ത്ഥനകളില് നിങ്ങളെയനുസ്മരിക്കുകയും
16: നിങ്ങളെപ്രതി ദൈവത്തിനു കൃതജ്ഞതയര്പ്പിക്കുകയും ചെയ്യുന്നതില്നിന്ന് ഞാന് വിരമിച്ചിട്ടില്ല.
17: നമ്മുടെ കര്ത്താവായ യേശുക്രിസ്തുവിന്റെ ദൈവവും മഹത്വത്തിന്റെ പിതാവുമായവന്, ജ്ഞാനത്തിന്റെയും വെളിപാടിന്റെയും ആത്മാവിനെ നിങ്ങള്ക്കു പ്രദാനംചെയ്തുകൊണ്ട് തന്നെക്കുറിച്ചുള്ള പൂര്ണ്ണമായ അറിവിലേക്കു നിങ്ങളെ നയിക്കട്ടെ!
18: ഏതുതരത്തിലുള്ള പ്രത്യാശയിലേക്കാണ് അവിടുന്നു നിങ്ങളെ വിളിച്ചിരിക്കുന്നതെന്നറിയാനും, വിശുദ്ധര്ക്കവകാശമായി അവിടുന്നു വാഗ്ദാനം ചെയ്തിരിക്കുന്ന മഹത്വത്തിന്റെ സമൃദ്ധി മനസ്സിലാക്കാനും നിങ്ങളുടെ ആന്തരികനേത്രങ്ങളെ അവിടുന്നു പ്രകാശിപ്പിക്കട്ടെ.
19: അതുവഴി അവന്റെ പ്രാഭവപൂര്ണ്ണമായ പ്രവര്ത്തനത്തിനനുസൃതമായി വിശ്വാസികളായ നമ്മിലേക്കു പ്രവഹിക്കുന്ന അവന്റെ അപരിമേയമായ ശക്തിയുടെ മഹനീയത എത്രമാത്രമെന്നു വ്യക്തമാകട്ടെ.
20: ക്രിസ്തുവിനെ മരിച്ചവരില്നിന്നുയിര്പ്പിക്കുകയും സ്വര്ഗ്ഗത്തില് അവിടുത്തെ വലത്തുവശത്തിരുത്തുകയുംചെയ്തപ്പോള്, അവനില് പ്രവര്ത്തിച്ചത് ഈ ശക്തിയാണ്.
21: അങ്ങനെ, ഈ യുഗത്തിലും വരാനിരിക്കുന്ന യുഗത്തിലും എല്ലാ ആധിപത്യങ്ങള്ക്കും അധികാരങ്ങള്ക്കും ശക്തികള്ക്കും പ്രഭുത്വങ്ങള്ക്കും അറിയപ്പെടുന്ന എല്ലാ നാമങ്ങള്ക്കുമുപരി അവനെ ഉപവിഷ്ടനാക്കി.
22: അവിടുന്ന്, എല്ലാ വസ്തുക്കളെയും അവന്റെ പാദങ്ങള്ക്കു കീഴിലാക്കുകയും എല്ലാറ്റിനും മുകളില് അവനെ സഭയ്ക്കു തലവനായി നിയമിക്കുകയുംചെയ്തു.
- 23: സഭ അവന്റെ ശരീരമാണ്; എല്ലാ വസ്തുക്കളിലും സകലവും പൂര്ത്തിയാക്കുന്ന അവന്റെ പൂര്ണ്ണതയുമാണ്.
അദ്ധ്യായം 2
-
രക്ഷ - ദൈവികദാനം
1: അപരാധങ്ങളും പാപങ്ങളുംമൂലം ഒരിക്കല് നിങ്ങള് മൃതരായിരുന്നു.
2: അന്ന്, ഈ ലോകത്തിന്റെ ഗതി പിന്തുടര്ന്നും, അനുസരണക്കേടിന്റെ മക്കളില് പ്രവര്ത്തിക്കുന്ന അരൂപിയായ അന്തരീക്ഷശക്തികളുടെ അധീശനെയനുസരിച്ചുമാണു നിങ്ങള് നടന്നിരുന്നത്.
3: അനുസരണക്കേടിന്റെ ഈ മക്കളോടൊപ്പം ഒരു കാലത്ത്, നമ്മളും ശരീരത്തിന്റെയും മനസ്സിന്റെയും അഭിലാഷങ്ങള് സാധിച്ചുകൊണ്ട്, ജഡമോഹങ്ങളില് ജീവിച്ചു; നമ്മളും മറ്റുള്ളവരെപ്പോലെ സ്വഭാവേന ക്രോധത്തിന്റെ മക്കളായിരുന്നു.
4: എന്നാല്, നമ്മള് പാപംവഴി മരിച്ചവരായിരുന്നിട്ടും കരുണാസമ്പന്നനായ ദൈവം നമ്മോടുകാണിച്ച മഹത്തായ സ്നേഹത്താല്,
5: ക്രിസ്തുവിനോടുകൂടെ നമ്മെ ജീവിപ്പിച്ചു; കൃപയാല് നിങ്ങള് രക്ഷിക്കപ്പെട്ടു.
6: യേശുക്രിസ്തുവിനോടുകൂടെ അവിടുന്നു നമ്മെ ഉയിര്പ്പിച്ച് സ്വര്ഗ്ഗത്തില് അവനോടുകൂടെയിരുത്തുകയുംചെയ്തു.
7: അവിടുന്ന്, യേശുക്രിസ്തുവില് നമ്മോടുകാണിച്ച കാരുണ്യത്താല്, വരാനിരിക്കുന്ന കാലങ്ങളില് തന്റെ അപരിമേയമായ കൃപാസമൃദ്ധിയെ വ്യക്തമാക്കാനാണ്, ഇപ്രകാരം ചെയ്തത്.
8: വിശ്വാസംവഴി കൃപയാലാണു നിങ്ങള് രക്ഷിക്കപ്പെട്ടത്. അതു നിങ്ങള് നേടിയെടുത്തതല്ല, ദൈവത്തിന്റെ ദാനമാണ്.
9: അതു പ്രവൃത്തികളുടെ ഫലമല്ല. തന്മൂലം, ആരുമതിലഹങ്കരിക്കേണ്ടതില്ല.
10: നാം ദൈവത്തിന്റെ കരവേലയാണ്; നാം ചെയ്യാന്വേണ്ടി ദൈവം മുന്കൂട്ടിയൊരുക്കിയ സത്പ്രവൃത്തികള്ക്കായി യേശുക്രിസ്തുവില് സൃഷ്ടിക്കപ്പെട്ടവരാണ്.- എല്ലാവരും ക്രിസ്തുവില് ഒന്ന്
- 11: നിങ്ങള് ശരീരംകൊണ്ടു വിജാതീയരായിരുന്നപ്പോള്, ശരീരത്തില് കൈകൊണ്ടു പരിച്ഛേദനം ചെയ്യപ്പെട്ടവര്, നിങ്ങളെ അപരിച്ഛേദിതരെന്നു വിളിച്ചിരുന്നതോര്ക്കുക.
12: അന്നു നിങ്ങള്, ക്രിസ്തുവിനെയറിയാത്തവരും ഇസ്രായേല്സമൂഹത്തില്നിന്ന് അകറ്റപ്പെട്ടവരും ഉടമ്പടിയുടെ വാഗ്ദാനത്തിനപരിചിതരും പ്രത്യാശയില്ലാത്തവരും ലോകത്തില് ദൈവവിശ്വാസമില്ലാത്തവരുമായിരുന്നുവെന്ന കാര്യം അനുസ്മരിക്കുക.
13: എന്നാല്, ഒരിക്കല് വിദൂരസ്ഥരായിരുന്ന നിങ്ങള്, ഇപ്പോള് യേശുക്രിസ്തുവില് അവന്റെ രക്തംവഴി സമീപസ്ഥരായിരിക്കുന്നു.
14: കാരണം, അവന് നമ്മുടെ സമാധാനമാണ്. ഇരുകൂട്ടരെയും അവനൊന്നിപ്പിക്കുകയും ശത്രുതയുടെ മതിലുകള് തകര്ക്കുകയുംചെയ്തു.
15: കല്പനകളുടെയും ചട്ടങ്ങളുടെയും ആധിപത്യം, അവന് തന്റെ ശരീരത്തിലൂടെയില്ലാതാക്കി.
16: ഇരുകൂട്ടരുടെയും സ്ഥാനത്ത് ഒരു പുതിയ മനുഷ്യനെ സൃഷ്ടിച്ചുകൊണ്ടു സമാധാനം സംസ്ഥാപിക്കാനും കുരിശുവഴി ഒരേ ശരീരത്തില് ഇരുകൂട്ടരെയും ദൈവത്തോടനുരഞ്ജിപ്പിക്കാനും അങ്ങനെ, തന്നിലൂടെ ശത്രുതയവസാനിപ്പിക്കാനുമാണ് അവനിങ്ങനെ ചെയ്തത്.
17: വിദൂരസ്ഥരായിരുന്ന നിങ്ങളോടും സമീപസ്ഥരായിരുന്ന ഞങ്ങളോടും അവന് സമാധാനം പ്രസംഗിച്ചു.
18: അതിനാല്, അവനിലൂടെ ഒരേ ആത്മാവില് ഇരുകൂട്ടര്ക്കും പിതാവിന്റെ സന്നിധിയില് പ്രവേശിക്കാന് സാധിക്കുന്നു.
19: ഇനിമേല് നിങ്ങള് അന്യരോ പരദേശികളോ അല്ല; വിശുദ്ധരുടെ സഹപൗരരും ദൈവഭവനത്തിലെ അംഗങ്ങളുമാണ്.
20: അപ്പസ്തോലന്മാരും പ്രവാചകന്മാരുമാകുന്ന അടിത്തറമേല് പണിതുയര്ത്തപ്പെട്ടവരാണു നിങ്ങള്; ഈ അടിത്തറയുടെ മൂലക്കല്ല് ക്രിസ്തുവാണ്.
21: ക്രിസ്തുവില് ഭവനമൊന്നാകെ സമന്വയിക്കപ്പെട്ടിരിക്കുന്നു; കര്ത്താവില്, പരിശുദ്ധമായ ആലയമായി അതു വളര്ന്നുകൊണ്ടിരിക്കുകയും ചെയ്യുന്നു.
22: പരിശുദ്ധാത്മാവില് ദൈവത്തിന്റെ വാസസ്ഥലമായി നിങ്ങളും അവനില് പണിയപ്പെട്ടുകൊണ്ടിരിക്കുന്നു.-
അദ്ധ്യായം 3
വിജാതീയരുടെ അപ്പസ്തോലന്
1: ഇക്കാരണത്താല്, വിജാതീയരായ നിങ്ങള്ക്കുവേണ്ടി യേശുക്രിസ്തുവിനെപ്രതി തടവുകാരനായിത്തീര്ന്നിരിക്കുന്ന
2: പൗലോസായ ഞാന്, നിങ്ങള്ക്കുവേണ്ടി ദൈവകൃപ കൈകാര്യംചെയ്യാന് നിയോഗിക്കപ്പെട്ടിരിക്കയാണെന്ന് നിങ്ങള് കേട്ടിട്ടുണ്ടല്ലോ.
3: ഞാന് മുമ്പ്, ചുരുക്കമായി നിങ്ങള്ക്കെഴുതിയിട്ടുള്ളതുപോലെ, വെളിപാടുവഴിയാണ്, രഹസ്യം എനിക്കറിവായത്.
4: അതു വായിക്കുമ്പോള് ക്രിസ്തുവിന്റെ രഹസ്യത്തെക്കുറിച്ച് എനിക്കു ലഭിച്ചിരിക്കുന്ന ഉള്ക്കാഴ്ചയെന്തെന്നു നിങ്ങള്ക്കു മനസ്സിലാക്കാം.
5: ഇപ്പോള് അവിടുത്തെ വിശുദ്ധരായ അപ്പസ്തോലന്മാര്ക്കും പ്രവാചകര്ക്കും പരിശുദ്ധാത്മാവിനാല് വെളിവാക്കപ്പെട്ടതുപോലെ, മറ്റു തലമുറകളിലെ മനുഷ്യര്ക്ക് ഇതു വെളിവാക്കപ്പെട്ടിരുന്നില്ല.
6: ഈവെളിപാടനുസരിച്ച്, വിജാതീയര് കൂട്ടവകാശികളും ഒരേ ശരീരത്തിന്റെ അംഗങ്ങളും സുവിശേഷത്തിലൂടെ യേശുക്രിസ്തുവില് വാഗ്ദാനത്തിന്റെ ഭാഗഭാക്കുകളുമാണ്.
7: ദൈവത്തിന്റെ കൃപാവരത്താല് ഞാന് ഈ സുവിശേഷത്തിന്റെ ശുശ്രൂഷകനായി. അവിടുത്തെ ശക്തിയുടെ പ്രവര്ത്തനങ്ങളുടെ ഫലമായിട്ടത്രേ എനിക്കീ കൃപാവരം നല്കപ്പെട്ടത്.
8: വിജാതീയരോട്, ക്രിസ്തുവിന്റെ ദുര്ഗ്രഹമായ സമ്പന്നതയെക്കുറിച്ചു പ്രസംഗിക്കാനും
9: സകലത്തിന്റെയും സ്രഷ്ടാവായ ദൈവത്തില്, യുഗങ്ങളോളം നിഗൂഢമായി സ്ഥിതിചെയ്തിരുന്ന രഹസ്യത്തിന്റെ പ്രവര്ത്തനം എല്ലാവര്ക്കും വ്യക്തമാക്കിക്കൊടുക്കാനുമുതകുന്ന വരം വിശുദ്ധരിലേറ്റവും നിസ്സാരനായ എനിക്കു നല്കപ്പെട്ടു.
10: സ്വര്ഗ്ഗീയ ഇടങ്ങളിലുള്ള ശക്തികള്ക്കും അധികാരങ്ങള്ക്കും സഭയിലൂടെ ദൈവത്തിന്റെ ബഹുമുഖജ്ഞാനം വ്യക്തമാക്കിക്കൊടുക്കാന്വേണ്ടിയാണ്, അവിടുന്നിപ്രകാരം ചെയ്തത്.
11: ഇതു നമ്മുടെ കര്ത്താവായ യേശുക്രിസ്തുവില് സാക്ഷാത്കരിക്കപ്പെട്ട അവിടുത്തെ നിത്യമായ ഉദ്ദേശ്യത്തിനനുസൃതമാണ്.
12: അവനിലുള്ള വിശ്വാസംമൂലം ആത്മധൈര്യവും ദൈവത്തെ സമീപിക്കാന് സാധിക്കുമെന്ന പ്രത്യാശയും നമുക്കുണ്ട്.
ക്രിസ്തുവിന്റെ സ്നേഹം
14: ഇക്കാരണത്താല്, സ്വര്ഗ്ഗത്തിലും ഭൂമിയിലുമുള്ള എല്ലാ പിതൃത്വങ്ങള്ക്കും നാമകാരണമായ
15 : പിതാവിന്റെ മുമ്പില് ഞാന് മുട്ടുകള് മടക്കുന്നു.
16: അവിടുത്തെ മഹത്വത്തിന്റെ സമ്പന്നതയ്ക്കു യോജിച്ചവിധം അവിടുന്നു തന്റെ ആത്മാവിലൂടെ നിങ്ങളുടെ ആന്തരികമനുഷ്യനെ ശക്തിപ്പെടുത്തണമെന്നും,
17: വിശ്വാസംവഴി, ക്രിസ്തു നിങ്ങളുടെ ഹൃദയങ്ങളില് വസിക്കണമെന്നും, നിങ്ങള് സ്നേഹത്തില് വേരുപാകി അടിയുറയ്ക്കണമെന്നും ഞാന് പ്രാര്ത്ഥിക്കുന്നു.
18: എല്ലാ വിശുദ്ധരോടുമൊപ്പം ക്രിസ്തുവിന്റെ സ്നേഹത്തിന്റെ നീളവും വീതിയും ഉയരവുമാഴവും ഗ്രഹിക്കാന് നിങ്ങള്ക്കു ശക്തി ലഭിക്കട്ടെ.
19: അറിവിനെയതിശയിക്കുന്ന, ക്രിസ്തുവിന്റെ സ്നേഹം നിങ്ങള് ഗ്രഹിക്കാനും അതുവഴി ദൈവത്തിന്റെ സമ്പൂര്ണ്ണതയാല് നിങ്ങള് പൂരിതരാകാനുമിടയാകട്ടെ.
20: നമ്മില് പ്രവര്ത്തിക്കുന്ന ശക്തിയാല്, നാം ചോദിക്കുന്നതിലും ആഗ്രഹിക്കുന്നതിലും വളരെക്കൂടുതല് ചെയ്തുതരാന് കഴിയുന്ന
21: അവിടുത്തേക്കു സഭയിലും യേശുക്രിസ്തുവിലും തലമുറകളോളം എന്നേക്കും മഹത്വമുണ്ടാകട്ടെ! ആമേന്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ